نئی دہلی، 22/ اگست (ایس او نیوز /ایجنسی) ایمس انتظامیہ کے ساتھ کامیاب مذاکرات کے بعد دہلی ایمس ریزیڈینٹ ڈاکٹروں کی گیارہ روزہ ہڑتال ختم ہوگئی اور ڈاکٹروں نے کام پر واپس آنے کا فیصلہ کیا ہے جس کے ساتھ ہی ایمس کے مریضوں نے راحت کی سانس لی ہے۔
یاد رہے کہ کولکاتا میں ایک ٹرینی ڈاکٹر کی عصمت دری کے بعد اُس کے قتل کے بعد ملک گیر سطح پر احتجاجی مظاہرے ہوئے تھے اور واقعے پر ڈاکٹروں نے سخت ناراضگی کا اظہار کیا تھا، اسی طرح گزشتہ 11 دنوں سے دہلی ایمس (آل انڈیا انسٹی ٹیوٹ آف میڈیکل سائنسز) کے ریزیڈنٹ ڈاکٹروں نے ہڑتال شروع کردی تھی، مگر اب ڈاکٹروں نے اپنی پڑتال ختم کردی ہے ۔
پریس ریلیز جاری کرتے ہوئے ایمس نے کہا کہ قوم کے مفاد میں اور عوامی خدمت کے جذبے کے تحت ایمس کے ڈاکٹروں نے گیارہ دنوں کی ہڑتال کے بعد کام پر واپس آنے کا فیصلہ کیا ہے۔ یہ ہڑتال 11 اگست 2024 کو شروع ہوئی تھی اور ڈاکٹروں کی جانب سے کام کے حالات میں بہتری اور ڈاکٹروں کی فلاح و بہبود جیسے مسائل اٹھائے جا رہے تھے۔ہڑتال کی وجہ سے اس ممتاز طبی ادارے کی متعدد خدمات معطل ہو گئی تھیں۔
آر ڈی اے نے ہڑتال ختم کرنے کا فیصلہ ایمس انتظامیہ کے ساتھ کامیاب مذاکرات کے بعد لیا۔ ہڑتال کی وجہ بننے والے بنیادی مسائل میں بہتر حفاظتی پروٹوکولز، تنخواہوں میں بہتری، اور طبی سامان اور بنیادی ڈھانچے کی فراہمی شامل تھیں۔ مذاکرات کے دوران دونوں فریقین نے ڈاکٹروں کی شکایات کو دور کرنے کے لیے سنجیدہ بات چیت کی گئی اور ایمس انتظامیہ نے آر ڈی اے کی طرف سے پیش کردہ کئی اہم مطالبات قبول کر لیے۔
ایمس انتظامیہ نے وعدہ کیا ہے کہ ان مسائل کو فوراً حل کیا جائے گا اور ڈاکٹروں کی کام کرنے کے حالات میں واضح بہتری لائی جائے گی۔
ایمس کے ریزیڈنٹ ڈاکٹروں کے ہڑتال پر جانے کی وجہ کولکاتا عصمت دری اور قتل کیس میں متاثرہ کو انصاف دلانا تھا۔ ریزیڈنٹ ڈاکٹروں نے ڈاکٹروں کے کام اور رہن سہن میں تبدیلی کا بھی مطالبہ کیا۔ اس میں 36 گھنٹے ڈیوٹی شفٹ اور آرام کے لیے محفوظ جگہوں کی کمی جیسے مسائل شامل ہیں۔ دہلی ایمس میں ملک بھر سے مریض علاج کے لیے آتے ہیں۔ ایسے میں ریزیڈنٹ ڈاکٹروں کی ہڑتال کی وجہ سے ایمس کا پورا نظام درہم برہم ہو کر رہ گیا ہے۔ اب امید ہے کہ جلد ہی ایمس کا نظام دوبارہ پٹری پر آ جائے گا۔
آر ڈی اے نے مذاکرات کے نتائج پر احتیاطی امید کا اظہار کیا ہے اور انتظامیہ کی طرف سے اٹھائے گئے مثبت اقدامات کا اعتراف کیا۔ ساتھ ہی جاری بات چیت کی ضرورت پر زور دیا ہے۔ ایسوسی ایشن نے اشارہ دیا ہے کہ وہ تسلیم شدہ اقدامات کی مؤثر عملداری کی نگرانی کرے گی اور اگر ضرورت پیش آئی تو مسائل کو پھر اٹھایا جائے گا۔
خیال رہے کہ سپریم کورٹ نے کولکاتا معاملہ کی سماعت کے دوران ہڑتال کر رہے ریزیڈنٹ ڈاکٹروں سے کام پر واپس آنے کی اپیل کی تھی۔ سی جے آئی ڈی وائی چندرچوڑ نے کہا تھا کہ ایک بار جب تمام ڈاکٹر کام پر واپس آ جائیں گے تو عدالت عمومی حکم جاری کرے گی۔ انہوں نے کہا، "یقین رکھیں کہ ایک بار جب ڈاکٹر دوبارہ ڈیوٹی شروع کر دیں گے، تو ہم عہدیداروں پر زور دیں گے کہ وہ ان کے خلاف کوئی منفی کارروائی نہ کریں۔‘‘